Pagpalambo sa teknolohiya gisagop sa siyudad

CEBU, Philippines — Gipatas-an pa sa kagamhanan sa siyudad sa Sugbo ang level sa pagsagop nila sa modernisasyon sa ubang transaksyon sulod sa Cebu City Hall.

Gihimo na usab sa niaging adlaw ang demo sa labing una nga electronic machine ug smart application sulod sa City Hall diin ang mga indibidwal makabayad sa ilang mga obligasyon sa kagamhanan, pag-withdraw og cash, pag-deposit sa nagkadaiyang electronic wallets.

Sa taho sa Cebu City Public Information Office, magamit usab ang maong machine alang sa pagbayad sa mga tawo sa ilang bill sa Visayan Electric ug Metropolitan Cebu Water District.

Sa laing bahin, gihimo usab sa niaging adlaw ang full council meeting sa Cebu City Development Council (CCDC) diin gihisgotan ni Engr. Dax Arcilla, hepe sa Management Information and Computer Services (MICS), ang implementasyon sa Smart City framework sa Dakbayan sa Sugbo.

Usa sa pamaagi niini mao ang pagamit sa mga nag-unang teknolohiya alang sa pagpalambo sa nagkadaiyang programa sa gobyerno.

Nahisgotan nini ang Standardization and Certification of Data Management, Integration of Cloud Technology for Data Management, Adoption of Data Analytics Tools, Implementation of the Internet of Things and Smart Devices ug Incorporation of Learning Systems and Artificial Intelligence.

Gipahimug-atan ni Arcilla ang kaayohan nga makuha sa teknolohiya alang sa tulin nga   data management processes.

Tungod usab sa modernisasyon sa mga ekipo, mahimong lapad ang pag-monitor sa mga imprastraktura, trapiko, waste management, ug ubang operasyon sa lokal nga kagamhanan. —/MEL (BANAT NEWS)