Bag-ong merkado tukoron sa lungsod sa San Francisco

CEBU, Philippines —  Gipaabot nga dunay bag-ong merkado nga itukod didto sa Barangay Consuelo sa lungsod sa San Francisco, isla sa Camotes.

Kini human nakaangkon na og luna ang maong barangay nga gidonar ni kongresista Duke Frasco sa kinto distrito.

Si Frasco nipalit sa maong luna gikan sa usa ka Severino Pascual gamit ang iyang kaugalingong kwarta aron makatukod og bag-ong merkado ang Consuelo.

“Aron nga ang atong mga kaigsuonan sa Barangay Consuelo, San Francisco aduna’y merkado nga modern, limpyo ug hamugaway, malipayon kitang mi-donar og 1, 287 square meters nga luna alang niini” matud ni Frasco sa usa ka press release nga gipadala niini ngadto sa mga sakop sa media.

Ang maong luna nagkantidad og P700, 000.

Ang itukod unya nga merkado sa Consuelo gipaabot nga mopalambo sa trade ug commerce sa barangay nga makatampo sa kalamboan sa lungsod sa San Francisco.