Frasco: Pagpalit og lechon gihimo sa laing-laing petsa

CEBU, Philippines — Gitataw ni Liloan Mayor Aljew Frasco nga ang pagpalit sa lungsod og lechon wala giusa gihimo kini sa lain-laing petsa depende sa okasyon nga ipahigayon.

Kini human ang Commission on Audit (COA) sa 2022 audit report niini nihulagway nga “irregular and unnecessary” ang paggasto sa Liloan og P1.357 million alang sa pagpalit og 207 ka lechon alang sa “team buildings, religious activities, founding anniversaries of private groups, graduation exercises, general assemblies, get togethers”, ug uban pa.

Matud sa COA nga ang maong pagpalit dili na unta kinahanglan ug ang pundo mamahimo pa unta nga magamit sa ubang proyekto ug serbisyo alang sa mga konsituwente sa lungsod.

Si Frasco nipasabot kini alang sa   katin-awan sa maong isyu.

“I would like to clarify that the COA audit covers the year 2022 and the procurement of the lechon was not a one-time purchase but rather made on different dates for several occasions such as inaugurations, general assembly, graduation exercises in support to official activities”, matud ni Frasco.

Si Frasco nagkanayon nga ang ulahing alegasyon nga gipakatap kadudahan ug bakak ug tumong lang niini nga maguba ang mga maayong buhat o kalamposan sa niagi ug kasamtangang administrasyon diin usa kini nga ubos kaayo nga paagi sa pagtay-og sa pagsalig sa mga Liloanon ngadto sa mga lider niini.

Gisaad sa mayor nga iyang siguradohon nga epektibo ang paggahin og pundo sa panudlanan sa lungsod subay sa taas nga standards ug mahimo silang transparent kanunay sa mga transaksiyon sa lungsod subay sa procurement law. (BANAT NEWS)