Lima ka JO nga adik gitaktak

CEBU, Philippines —  Lima ka job order (JO) nga kawani gikan sa Cebu City Markets Operations Division (MOD) ang gi-terminate human napositibo sa paggamit sa ilegal nga drugas.

Sa taho sa Cebu City Public Information Office, Ang hepe sa MOD nga si Robert Barquilla mipasidaan sa tanang empleyado ubos sa iyang buhatan nga walay kaayohan nga mahatag ilabi na pagserbisyo sa gobyerno kun sagolan og bisyo.

“Labi na gyud nga naa ta sa public service. Basta ang empleyado mag-bisyo, sigurado apektado ang iyang pang-serbisyo,” niya pa.

Una niini gihimo sa Cebu City Office for Substance Abuse Prevention (COSAP) ang drug test sa niaging semana sa tanang JO personnel sa MOD human sila makadawat og tahu nga dunay mga kawani nga tiggamitan og ilegal nga drugas. Una na nga gibutyag sa hepe sa COSAP nga si Jonah John Rodriguez nga gihatagan og importansya sa siyudad ang tulin nga pagserbisyo busa kinahanglan nga wala gyuy impluwensya sa drugas ang mga indbidwal nga nalambigit sa pagpangalagad.

Samtang gipaubos sa surprise drug test ang mga traffic enforcer sa Traffic Enforcement Agency of Mandaue (TEAM), mga empleyado sa City Social Welfare and Development Services (CSWS) sa Home of Mandaue (HOME) Children’s Center sa Barangay Basak uban sa Mandaue City Substance Abuse and Prevention Office (MCSAPO.

Ang pangulo sa MCSAPO nga si Atty. Ben Manzano miingon nga lainlaing kalihokan ang ilang himoon nga naglambigit sa pagsumpo sa ilegal nga drugas.

Sa laing bahin gitinguha ni Lapu-Lapu City Mayor Junard “Ahong” Chan nga makabaton og panginabuhian ang mga migradwar sa drug rehabilitation program sa dakbayan. Gipadayag kini sa mayor atol sa pagsaulog sa International Day Against Drugs and Anti-Illegal Trafficking (IDDAIT) niadtong miaging adlaw.

Tinguha ni Chan ang pag-endosar niini sa livelihood skills training nga pagahimoon sa Technical Education and Skills Development Authority o TESDA aron makatabang kanila sa pagsulod og trabaho o kaha pagtukod og negosyo. Romeo T. Limpangog, MEL  (BANATNEWS)