Barcenas nanawagan nga tangtangon ang Carcar sa red zone

CEBU, Philippines — Nanawagan si Carcar City Mayor Patrick Barcenas ngadto sa Department of Agriculture-Bureau of Animal Industry nga tangtangon ang iyang siyudad sa mga “red zone” nga lugar nga nataptan sa African Swine Fever (ASF).

“Maayo unta tangtangon na sa DA kanang red tagging sa among siyudad kay wala may ASF diri. Hagbay ra wala nay ASF diri. Basin sa among survey, wala nay mga baboy nga nangamatay tungod sa ASF”, matud ni Barcenas atol sa gipahigayong press conference.  Base sa memorandum nga gipagawas ni BAI director Paul Limson sa updated zoning map ug zoning status sa matag siyudad/munisipyo nga gi-categorized sa zoning plan ang naglangkub sa mga bag-ong ASF nga apektadong lugar nga gitaho sa DA-BAI gikan Hunyo 2 hangtud sa 14, 2023 diin ang Dakbayan sa Carcar ang nalakip gihapon sa red zone uban sa laing 11 ka local government units sa Sugbo.

Si Senador Imee Marcos kinsa nibisita kagahapon sa siyudad alang sa paghatag og financial assistance niuyon sa apela sa mayor.

Matud ni Marcos nga 67 porsyento sa tanang produksiyon sa baboy mga backyard enterprise dili sa commercial scale.

“Pag pink zone ka na hindi ka na red, you have the right to get fresh stock from DA for free. There is a level of help from the government, mag-umpisa na tayo nang restocking”, matud ni Marcos. Ang DA nagkanayon nga ang zoning maoy usa sa giila nga international nga mga estratehiya nga girekomendar sa Office International des Epizooties (OIE) o sa World Organization of Animal Health aron mapugngan ang pagkuyanap sa bisan unsang sakit sa mananap. Ang Dakbayan sa Carcar diin ang unang mga kaso sa ASF sa Sugbo natala niadtong buwan sa Marso niining tuiga apan nakontrolar na kini niadtong buwan Abril. “Dugay ra nisaka na ang sales sa lechon ug chicharon. Maayo unta ilaha (DA-BAI) i lift ang red tagged”, hangyo ni Barcenas. —/BDB (BANAT NEWS)