Duha ka lalaking gi-salvage nangailhan na

CEBU, Philippines —  Nailhan na sa kapulisan sa Lungsod sa Sibonga ang lalake nga napalgan gibinaklid ug gituohang gi-salvage duol sa Simala Elementary School, Barangay Simala, Lungsod sa Sibonga niadtong Biyernes sa kaadlawon.

Giila ang biktima nga si Rodelio Pialan, 24, sakop sa Alpha Kappa Rho fraerity ug residente sa Sitio Canwaling, Barangay Bulak, Lungsod sa Dalaguete.

Si Pialan gibinaklid og gapos sa luyo ang duha niini ka mga kamot ug adunay samad pinusilan sa buko-buko ug ulo.

Sigon ni Police Staff Sergeant Roland Napere nga nahinabi sa Banat News pasado alas 3 sa hapon sa adlaw’ng Biyernes miadto ang inahan sa biktima nga si Agripina Pialan, 54, ug mi-claim sa lawas sa anak.

Gitug-an matud pa sa inahan ngadto sa kapulisan nga alas-2 sa kaadlawon niadtong Biyernes nananghid ang iyang anak nga molakaw kuyog iyang amo.

Padayon nga gisusi sa kapulisan ang background sa biktima sanglit wala’y nakaila niini sa lungsod. Gisusi pa usab kun kinsa ang “amo” sa biktima ug kun unsa iyang trabaho o negosyo sa amo.

“Mao pa na among gitan-aw karon sigehan namo og follow up kay wala man guy nakaila ana diri, maoy among problema dili taga diri, wala puy nakakita,” sigon ni Police Staff Sergeant Napere sa Sibonga.

Sa pikas bahin, ang lalaki usab nga napalgang patay sa Purok Tambis, Barangay Lawaan 2, Dakbayan sa Talisay tulo ka adlaw na ang nakalabay nailhan na sa kapolisan pinaagi sa mga ginikanan niini.

Ang patay’ng lawas mao si Joh Kier Vilando, 18, taga lungsod sa Minglanilla.

Matud pa ni Police Lt. Col. Randy Caballes, hepe sa kapolisan sa Talisay si Vilando napalgang nag ubo sa nahisgutang lugar niadtong Martes sa buntag nga adunay usa ka pinusilan diha sa luyong bahin sa iyang lawas.

Si Caballes miingon ng duna na silay testigo ug person of interest ug nasuta sab nila sa imbestigasyon nga ang biktima tigpalitan og ilegal nga drugas sa dapit ug posible nga wala kini magkasinabot sa gipalitan hinungdan nga gipusil.

Giandam sa kapolisan ang kasong murder nga ipasaka batok sa suspetsado.—  Gabriel Bonjoc/IBM