Namadlong sa nagsaba-saba gipusil

CEBU, Philippines — Nalandig sa tambalanan ang usa ka lalaki human siya gipusil sa giingong astig sa ilang lugar sa sitio Abalo, Barangay Cansojong, Dakbayan sa Talisay niadtong Biyernes sa gabii.

Ang biktima mao si Lyndon Abalo Morales, 24 anyos samtang ang suspek nailhan nga si Edmon Reponte.

Ang igsuon sa biktima nga si Roldan Abalo Morales maoy nagpakitabang sa kapolisan ug misaysay sa gidangatan sa iyang igsuon.

Sa inisyal nga pakisusi sa kapolisan nasuta nga milabay sa lugar ang suspek nga si Reponte uban sa iyang higala.

Pero ang ilang pag agi sa dapit nakamugna og saba sa dihang ilang gihapak-hapak ang sin nga gihimong ali sa tapad nga panimay sa biktima.

Ang biktima nga si Morales mibadlong sa grupo sa suspek apan nasuko kini ug nibunot sa armas dayon pusil makaduha ka higayon ngadto sa biktima nga naigo sa iyang dughan ug tiil.

Nisibat ang suspek uban sa iyang mga higala samtang gidala sa tambalanan ang biktima. Si Police Lt. Col. Randy Caballes, hepe sa kapolisan nibutyag nga giingong astig sa ilang dapit ang suspek ug ang motibo mao lang gyud ang bikil sa pagbadlong sa pagsaba-saba.

Sa pagkakaron padayon pa nga gipangita sa kapolisan ang suspetsado.