Sweldo sa mga JO sa Mandaue usbawan

CEBU, Philippines —  Gipahibalo ni Mayor Jonas Cortes ang pagpausbaw sa sweldo sa mga job order employees sa city hall sa Siyudad sa Mandaue subay sa ordinansa nga gipalabang sa mga sakop sa konseho sa siyudad atol sa ilang regular session.

Sa iyang mensahe, si Cortes nagkanayon nga ang mga job order personnel ang naghupot usab og mga kaakuhan nga mahimong epektibo ang kagamhanan.  Matud ni Cortes nga dako og gikatampo ang mga job order personnel sa serbisyo sa  kagamhanan ngadto sa katawhan hinungdan nga angayan lang nga usbawan ang  gidawat nilang honorarium sa matag bulan.

Ang paghatag og umento sa honorarium sa mga JO isip kini bugti sa ilang kakugi sa serbisyo.

Gitan-aw sa opisyales sa siyudad ang kamahinungdanon sa pagpaumento sa honorarium sa mga JO aron paghatag kanila og pinasyal nga kalig-on ug ilang matubag ang ilang inadlaw-adlaw nga panginahanglan.

Nagpasalamat si Cortes sa konseho sa siyudad nga nagsuporta sa ordinansa ug nag-ila sa kamahinungdanon sa mga JO.  “Furthermore: I would like to assure our citizens that this increase in the daily honorarium of our job order personnel will not effects on the stability of our city”, matud ni Cortes sa iyang mensahe.

Gipasalig ni Cortes nga ang maong kalamboan sa paghatag og increase sa honorarium sa mga JO dako og ikatabang sa mas malambuon pa nga serbisyo sa pagpadayon sa trabaho alang sa kaayohan sa mga Mandauehanon.