CMS nidawat sa hagit pagdumala sa donasyon

MANILA, Philippines —  Gidawat sa Cebu Medical Society ang hagit sa pagdumala sa mga donasyon gikan sa mga pribadong entities alang sa kahumanan sa Cebu City Medical Center.

Ubay-ubay nga mga kompaniya nga nipasalig kang Mayor Michael Rama nga mo-donate sa CCMC ug gusto na nga i-turn over ang ilang donasyon apan alang sa transparency gusto sa mayor nga ang CMS ang modumala aron maklaro ang padulngan niini.

Ang CMS, miyembro sa Philippine Medical Association usa ka non-profit, professional nga organisasyon nga naghiusa sa tanang medical practitioners ug nagtanyag og libreng serbisyong medikal.

Ang CMS adunay bililhon nga kontribusyon sa Dakbayan sa Sugbo ilabi na sa tibuok gubat batok sa COVID-19 pandemic hangtud sa pagkalingkawas niini.

Human sa COVID-19 nabatyagan ni Rama nga bililhon gihapon kaayo ang CMS sa tumong niini nga mahuman ang katukoran sa 10 ka andana nga edipisyo sa CCMC.

Human makanselar ang kontrata sa kataposang contractor niini tungod kay napakyas sa pagtuman sa mga saad, si Rama nagkanayon nga dili na sila moabli og bisan unsang bidding alang sa bag-ong contractor apan mohimo sila og public-private partnership.

Gawas sa nahabilin nga pundo gikan sa panudlanan sa siyudad, si Rama nipamutunan sa pagpangayo ngadto sa mga pribadong entities nga kasagaran sa Manila aron makab-ot ang iyang tinguha.

Ang CMS pinangulohan sa presidente niini nga si Dr. Peter Mancao kinsa sa pagkakaron mao usab ang bag-ong hepe sa CCMC nagkanayon nga nagkasabot na ang mga opisyal ug sakop sa pagdumala sa mga donasyon ug accounting.

Bisan kong matapos na ang termino sa kasamtangang set sa mga opisyal sa CMS nasiguro na nga ang CMS magpadayon sa pagtipig sa bisan unsang pundo nga ilang makuha gikan sa mga pribadong donor.

Sa laing bahin, si Mancao nagkanayon nga ang construction sa CCMC gipaabot nga mabalik sa dili madugay.

Sa sayo pa, si Engineer Ricky Dakay nagkanayon nga ang kasamtangang pito ka andana nga edipisyo mahimong ipadayon uban sa orihinal nga 10 ka andana nga desinyo uban sa pagkorihir sa pipila ka mga depekto sa istraktura nga nakita. Caecent No-ot Magsumbol