Beneficiaries sa Sugbo Negosyo program gipatun-an

CEBU, Philippines —  Gipa- review karon ni Gobernador Gwendolyn Garcia ngadto nila ni bise Gobernador Hilario Davide III ug sa 17 ka mga bokal sa Probinsya sa Sugbo ang performance sa mga beneficiaries sa Sugbo Negosyo program nga ubos sa tagsa tagsa niini ka buhatan.

Kini human nasayran sa gobernadora nga 18 ra gikan sa 38 ka mga district winners sa maong programa ang kwalipikado sa provincial round sa maong kompetisyon.

Segun sa Capitol Information Office nga pipila sa mga nakadaug ang na-disqualify gumikan sa rule violations samtang ang uban mi back out.

Sa nasayran ang Kapitolyo nigahin og P100 million sa ikaduhang round sa Sugbo Negosyo program diin ang pundo niini giagi sa buhatan sa mga provincial board members.

Ang maong programa nagtinguha pagtabang nga molambo ang negosyo sa mga gagmay nga magpapatigayon sa Probinsya sa Sugbo.

Gipaabot nga human sa review sa mga bokal, moreport kini ngadto sa gobernadora karong Hunyo 19.

Samtang padayon ang gihimo karon nga caravan of services sa Probinsya sa Sugbo sa nagkadaiyang distrito sa lalawigan.

Kagahapon didto sa lungsod sa Pilar sa isla sa Camotes, ang Kapitolyo nibubo og dul-an P80 milyones nga kantidad sa proyekto.

Gibuksan usab ang P3.9 milyones nga kantidad sa bag-ong nahuman nga multi-purpose covered court sa barangay Esperanza ug P4million nga covered court usab ang gi-inagurahan didto sa barangay San Juan sa lungsod sa Pilar.

Si Garcia mao ang nangu sa inagurasyon sa San Francisco – Sta Cruz Cabunggan Road section sa Pilar nga mokantidad og P79 million.

Niadtong Hunyo 6, gihatag usab sa Kapitolyo ang tag usa ka milyon ka pesos ngadto sa Mandaue, Consolacion, ug Cordova isip inisyal nga pundo alang sa pagbuhi og baboy subay sa Sugbo Baboyan sa Tugkaran nga programa sa Probinsya. — MEL  (BANATNEWS)