Balili gidestino nga bag-ong rector sa Seminario Mayor de San Carlos

CEBU, Philippines — Si Padre Mhar Vincent Balili, kanhi kura paruko sa Mary Help of Christian sa Barangay Buhisan gitudlo ni Cebu Archbishop Jose Palm nga bag-ong rector sa Seminario Mayor de San Carlos atol sa kapisthahan sa parokya niini niadtong Miyerkules sa buntag nga gitambongan sa gatusan ka kaparian ug magtutuo.

Si Palma nagkanayon nga sa pagkakaron wala pa siya masayod kinsa ang mohulip ni Balili tungod kay ang board of consultors na ang mag-igo niini sa pagpili.

Ang maong pagbalhin ni Balili kabahin kini sa mga lahugay sa umaabot nga mga adlaw diin aduna pay mga pari nga ibalhin og destino.

Si Balili sa iyang bahin, nagkanayon nga dako kaayo nga tahas nga nagpaabot kaniya apan salig lang siya sa Grasya sa Ginoo ug nanghinaot kini nga padalhan ug kura paruko ang Buhisan nga adunay kasing-kasing sa mga kabus ug taga bukid. Subay niini, si Palma maoy nangulo sa Misa Pontipika sa ika-24th Annual Fiesta Celebration sa Mary Help of Christian Parish nga adunay tema nga ‘Mary Help of Christian a Model of Synodality”.

Ang Arsobispo mapasalamaton tungod kay nindot kaayo lantawon human nakalatas sa COVID-19 ug bagyong Odette puno sa katawhan ang simbahan.

Matud ni Palma nga ang Pilipinas gitawag og nasud nga nahigugma kang Mama Mary bisan sa lain-lain nga titulo niini hinungdan nga angayan nga pamalandongan sa katawhan ang panaw niini bisan taliwala sa daghang mga pagsulay ug problema anaa ang langitnon nga inahan nga nihatag ug nipaambit sa iyang gugma.

Gidasig ni Palma ang katawhan nga sa higayon nga aduna kini problema bisan sa pagduol nila sa ilang tagsa-tagsa ka inahan dili usab kalimtang ang Birhen Maria uban sa pag-ampo sa Santo Rosario. —/BDB  (BANAT NEWS)