Duha nasikop sa buy-bust sa Mandaue
CEBU, Philippines — Nadakpan sa kapolisan ang usa ka senior citizen nga pusher og shabu kauban sa iyang pag-umangkon sa buy bust operation nga gipahigayon sa Barangay Tipolo sa Siyudad sa Mandaue alas 11 pasado ang takna sa miaging gabii. Si Police Major Troy John Lalamunan, pangulo sa City Intelligence Unit (CIU) sa Mandaue City Police Office (MCPO) miila sa nadakpan nga mao si Mario Ocaresa, 63 anyos ug pag-umangkon niini nga si Israel Ocaresa, 37 anyos nga pulos molopyo sa Barangay Inayawan sa Siyudad sa Sugbo.
Nakuha gikan sa duha ka dinakpan ang upat ka gramo nga shabu nga nagkantidad og P27,000.
Giangkon sa senior citizen nga tiggamitan gyud siya og illegal nga drugas hangtud nga natintal usab siya sa pagpamaligya niini.
Sa laing bahin mahinangpon nga gipahibalo sa La Libertad Negros Oriental, nga malampuson ang ilang kampanya batok sa illegal nga drugas.
Kini human dugang 13 ka mga barangays sa La Libertad ang gideklarar nga drug-cleared human sa hugot nga deliberasyon sa Regional Oversight Committee.
Ang mga barangay nga gideklarar nga drug cleared mao ang Barangay Talaon, Manluminsag, Mapalasan, Kansumandig, Pitogo, Bigaa, Busilac, Talayong, Eli, Aya, Martilo, Manghulyawon, ug Cangabo.
Laing lima ka barangay ang naglihok na usab sa mga gikinahanglan nga dokumento aron makab-ot ang susama nga status diin ang kapolisan sa La Libertad PNP nagpadayon sa ilang paghimo ug mga programa aron magpabilin nga drug cleared ang mga barangay.
Si PCapt Mark Anthony Apsay, Hepe sa La Libertad Police Station, mapasalamaton kang Mayor MM Iway ug sa tanan nga nagsuporta sa pakigbatok sa illegal nga drugas. —Rowena D. Capistrano (BANAT NEWS)
- Latest
