60-anyos gidunggab samtang nagmotor, patay
CEBU, Philippines — Patay ang usa ka 60-anyos nga motorista human kini gidunggab Domingo sa gabii diha sa Purok Mangga, Barangay Estaca sa Lungsod sa Compostela.
Si Police Captain Kelvin Roy Mamaradlo, hepe sa Comostela Police Station miila sa biktima nga mao si Leonilo Torres, nagpuyo sa maong dapit. Sa imbestigasyon nga gihimo sa kapolisan, sakay ang biktima sa iyang motorsiklo pauli sa ilang panimalay sa dihang usa ka wala hiilhing lalaki nga gituohang nag-atang ng daan kaniya ang kalit lang misugat ug giduslak kini og mahait nga hinagiban.
Bisan nakabaton og samad dinunggaban sa kalawasan ang biktima nakapahunong ug mikanaog kini sa motorsiklo ug midagan, apan gikatahong pagabot sa unahan nahagba kini.
Si Mamaradlo miingon nga ang mga molupyo sa maong lugar maoy nagpahibalo sa ilang buhatan bahin sa insidente apang sa ilang paghidangat sa maong dapit patay na ang biktima.
Wala pa mahibaw-i sa kapolisan kun kinsa ang mamumuno ug motibo niini pagpatay sa biktima. (BANAT NEWS)
- Latest
