Bata naligo sa dagat nabitikn sa pukot nalumos

CEBU, Philippines —  Patay ang usa ka 7-anyos nga batang lalaki nga giingong nabitik sa pukot samtang naligo sa dagat sa Barangay Pilipog sa Lungsod sa Cordova alas-12 sa miaging Biyernes sa udto.

Si Police Major Michael Gingoyon, hepe sa Cordova Police Station miila sa namatay nga mao si Mark Vincent Gallego nagpuyo sa Purok Mahogany sa nahisgotang barangay.

Matud pa ni Gingoyon nga ang iyaan sa bata nga si Nica Dela Torre maoy nagtaho sa  ilang buhatan sa maong insidente.

Dugang pa Gingoyon nga nagkuyog sa iyang pag-umangkon ang duha ka silingang bata nga nangaligo sa dagat sa Purok Tugbongan duol sa CCLEX sa Barangay Pilipog.

Gitug -an sa mga kauban niini nga misawom si Mark Vincent apan wala na kini motunga sa ibabaw. Ang mga bata daling nangayo og tabang.

Si Gingoyon miingon nga ang uyoan sa bata daling nisawom ug didto nakita sa ilawom ang bata nga nabitik kini sa gitaan nga pukot.

Dali kining gidala sa mga sakop sa Rural Health Unit sa maong lungsod ngadto sa tambalanan apan gideklarar kining dead on arrival. (BANAT NEWS)