VECO nipakunhod og P0.38 per kWh

CEBU, Philippines —  Makasinati ang Visayan Electric residential consumers og P0.38 per kWh nga pagkunhod sa bayranan sa konsumo sa kuryente alang sa buwan sa Mayo ngadto sa Hunyo  tungod sa ubos nga presyo sa coal ug transmission charges.

Ang pagkunhod nagdala sa kasamtangang rate gikan sa niaging P14.25/kWh ngadto sa P13.87/kWh.

Nagpasabot kini nga ang kasagarang panimalay nga mokonsumo og 200 kWh matag buwan makadaginot og P76.00 sa sunod nilang bayronon.

Bisan pa sa pagkunhod sa residential rates alang sa nahisgutang mga buwan, ang maong kompaniya niawhag sa mga konsumedor nga magpadayon sa pagkonserbar sa kuryente ilabi na nga gipahibalo sa Philippine Atmospheric, Geophysical and Astronomical Services Administration (PAGASA) kabahin sa 80 porsyento nga posibilidad sa El Niño nga mahitabo sa buwan sa Hunyo nga posibleng magpadayon hangtud sa unang quarter sa tuig 2024.

Ang mga datos nagpadayag nga ang temperatura usa sa mga nag-unang hinungdan sa pagtaas sa paggamit sa elektrisidad diin kong init ang temperatura ang mga konsumedor kanunay nga mogamit sa ilang cooling appliances.

Si Visayan Electric President ug Chief Operating Officer Raul Lucero nihatag og gibug-aton sa kamahinungdanon sa pagdaginot sa kuryente ilabi na sa ting-init o sa panahon nga taas ang temperatura.

“At the start of the dry season, we saw an increase in demand for electricity. With the El Niño looming, it is expected that temperatures might continue to rise and that is why it is very important for us to be mindful of our electricity consumption and save electricity as much as we can”, matud ni Lucero.

Lakip sa mga paagi sa pagdaginot sa kuryente mao ang pagtangtang sa mga appliances nga wala gigamit, pagpalong sa suga ug paggamit sa natural nga kahayag kong mahimo, ug pagsiguro nga ang cooling appliances sama sa air conditioner ug electric fan gitarong og mentinar.  -  BDB (BANATNEWS)