OFW Help Desk ibutang sa Siyudad sa Toledo

CEBU, Philippines —  Aduna na’y OFW Help Desk ang Dakbayan sa Toledo ug gihimo na sa niaging adlaw ang pagpirma og kasabotan tali sa Kagamhanan sa Toledo ug Overseas Workers Welfare Administration (OWWA).

Ang pinirmahay gipahigayon sa buhatan sa mayor sa dakbayan sa Toledo nga si Marjorie Perales.

Segun sa tahu sa Toledo City Public Information Office, ang maong help desk maoy instrumento alang sa tulin nga pagpadangat sa ilang mga programa sama sa scholarship ug livelihood projects.

Mao usab kini ang mopadali sa pag-apod apod kun dunay mga ayuda alang sa OFWs. Sa nasayran adunay kapin sa 15,000 ka migrant workers nga nagikan sa Toledo niadtong 2022.

Gipaneguro sa OWWA ang lig-ong relasyon nila tali sa mga lokal nga kagamhanan.

Human sa pinirmahay sa kasabutan, niapod apod dayon ang OWWA og tag P10,000 ngadto sa walo ka mga benepisaryo sa Owwa Educational Assistance by Scholarship in Emergencies (Project Ease) ug OFW Dependent Scholarship Program. Sanden J. Anadia/MEL

76 ka sakyanan naisyuhan og TOP sa operasyon sa Mandaue

Mokabat sa 76 ka mga sakyanan ang nasita ug naisyuhan og Temporary Operators Permit TOP atol sa Joint Anti-Criminality Motor Stop and Road Clearing Operation diha sa dakbayan sa Mandaue. Ang lugar diin gihimo ang operasyon mao ang dalan H. Abellana sa barangay Canduman ug M. Logarta sa barangay Subangdaku. Giapilan ang maong operasyon sa mga sakop sa Traffic Enforcement Unit sa Mandaue City Police Office (MCPO) mga personnel sa Traffic Enforcement Agency of Mandaue (TEAM) ug Land Transportation Office 7.

Nunot sa maong operasyon natigayon usab ang pag-impound sa 16 ka motorsiklo ug tulo ka mga sakyanan tungod sa mga kalapasan nga nahimo nga naglakip sa expired na nga rehistro ug uban pa. (BANAT NEWS)