CEMVEDCO nireklamo sa planong amendasyon sa market code
CEBU, Philippines — Nabalaka ang Cebu Market Vendors Multipurpose Cooperative (CEMVEDCO) nga basin pipila sa ilang supplier ang mawad-an og gana sa paghatud sa ilang mga produkto diha sa Carbon Market kon motaas ang mga bayranan niini.
Tipik kini sa posisyon sa CEMVEDCO kalabot sa proposed ordinance nga mag- amendar sa pipila ka sections sa 2017 Cebu City Market Code.
Si Erwin Gok-ong, chairman sa CEMVEDCO maoy nipadala sa position letter ngadto sa konseho ug giingong dili patas alang kanila nga sa Carbon ra ma-apply ang gitinguha mga pag-amendar sa market code.
Matud sa maong grupo nga sa kasamtangang City Ordinance 2514, adunay P20 ang bayranan sa matag banyera sa isda o P.80 matag kilo ug kong maamendar ang ordinansa posibleng mosaka kini ngadto sa P175 matag banyera alang sa second ug third-class nga isda.
Ug siguradong maakapekto kini sa presyo sa mga baligyang isda sa Carbon.
“Kilo sa isda sa Taboan Public Market, Pardo Public Market, T. Padilla Public Market ug ubang merkado publiko ug Talipapa mo presyo og P120 per kilo. Ang mahitabo sa Carbon Market P130 o kaha P135 ang kilo”. tipik sa unod sa position letter.
Ang suwat sa CEMVEDCO kabahin gihapon sa nagpadayon nga public hearing sa planong pag-amendar sa pipila ka mga section sa market code sa siyudad nga giduso ni Konsehal Renato Osmeña, Jr.
Ang mga panahom gikan sa nagkadaiyang grupo sa vendors ug stake holders tun-an aron masuta kong aduna ba'y usbon sa pipila ka bahin sa market code. Gikwestiyon usab sa CEMVEDCO ang giplano nga ang Cebu2World Development, Inc. may mokolekta sa mga bayranan.
“Unsa man gyud ang merkado sa Carbon? Merkado publiko o dili? Tungod kay sa scope of application sa proposed amendment nag-ingon nga ‘relative to the Carbon Public Market, ug sa mga sunod nga sections, nag-ingon Cebu Carbon Market ug usahay Carbon Market ra?” dugang ni Gok-ong .— /BDB (BANAT NEWS)
- Latest
