Mieskapong CICLs padayong gipangita

CEBU, Philippines — Padayon pa ang pagpangita sa kapulisan sa dakbayan sa Sugbo sa tulo ka Children in Conflict with the Law nga mi-eskapo sa Operation Second Chance sa miaging semana.

Matud ni Cebu City Police Office Director Police Colonel Ireneo Dalogdog nga padayon ang follow-up rescue operation sa Waterfront Police Station, Mabolo Police Station 4 ug Carbon Police Station 5 apil na ang tracker team sa Investigation and Detective Management Unit(IDMU) sa CCPO.

Giadto na ang mga ginikanan sa mga mieskapo apil na sab ang ilang mga barkada ug kaparyentihan kay basin didto kini nagtago-tago aron i-surrender.

Ang tulo nagpangidaron og 18 anyos nga nag-atubang og kasong may kalambigitan sa illegal nga drugas ug frustrated homicide. Siyam ang nieskapo apan unom ra ang narekober sa CCPO ug BJMP.

Gipapas sab ni Dalogdog ang kabalaka sa mga CICLs sa maong pasilidad nga nag-noise barrage sa miaging semana sa pagtuong bawal na ang dalaw kanila.  Matud ni Dalogdog, dili kini tinuod.

Aron pahugtan ang seguridad, walo ka polis sa Cebu City Mobile Force Company ug walo ka jail officers sa BJMP ang nagbantay sa pasilidad.

Duna say proposal ang CCPO nga maghimo og wellness programa ang PNP sa maong pasilidad sama sa zumba o kaha sport aron sab nga dili bati ang tan-aw sa mga CILC sa kapulisan.

Samtang asoy sab ni Dalogdog nga irekomendar nila nga kadtong 18 anyos na nga CILC ipalain na og kabutangan og pasilidad aron dili sila maka-impluwensiya sa mga menor de edad.

Si Konsehal Phillip Zafra, ang Chairman sa Committee on Peace and Order sa siyudad miingon nga ang modumala sugod karong Lunes sa OSC mao si Portia Basmayor, OIC-Assistant Department Head sa Department of Social Welfare and Services.

Si Basmayor nitug-an nga nagobserbar pa karon ang iyang mga staff kung unsa ang ilang mga kiinahanglang buhaton.

Ang pasilidad dunay 90 kapin ka mga bata nga gibahin nila sa lima ka grupo ug gitahasan ang tanan  og mga ginbuhaton.

Makig-alayon usab sila sa SK Federation President sa dakbayan aron makapahigayon ug summer league o summer camp para sa mga bata sa dili pa matapos ang Mayo.— Rowena Capistrano (BANAT NEWS)