Ticket sa bus sa CSBT mapalit sa online
CEBU, Philippines — Ang mga pasahero sa Cebu South Bus Terminal (CSBT) mamahimong makapalit daan og bus ticket hilabina ang mga padulong sa habagatang bahin sa Sugbo.
Ang Topline Hi-Tech Synergy Corporation, usa ka pribadong kompaniya nga nag-operated sa automated system sa CSBT nilusad sa Topline Travel App aron ang mga pasahero maka-book daan og ticket gamit ang mga smartphone.
Ang mga pasahero maka-download sa maong mobile app pinaagi sa Apple Store sa mga iPhone users ug Google Playstore sa mga android phone users.
“Easy ra gyud kaayo, you need to sign up through your Facebook account or imohang email account and then once ma okay na siya ready to go na ka”, matud ni Shayne Maramara, manager sa Topline.
Sa maong app makapili ang mga pasahero asa ilang rota diin nakalatid usab ang presyo sa ticket ug available nga mga bus sa maong adlaw.
Matud ni Maramara nga pinaagi sa maong app dili na kinahanglan pa nga molinya ang pasahero diha sa CSBT aron mopalit og ticket hilabina panahaon sa peak season.
Ipresentar lang ang QR code gikan sa app ug makaderetso na kini og sulod.
Si Carmen Quijano, manager sa CSBT nihangop sa maong kalamboan ug matud niya nga dugang kining paghatag og kahapsay o convenience sa mga pasahero sa terminal. Sa mga walay smartphones mamahimong gamiton ang mga Suroy-Suroy cards sa pagpalit og ticket aron dili na madugay sa linya. — BDB ( Banat News )
- Latest
