4 ka corn-drying facility ibutang sa Medellin

CEBU, Philippines — Aron makatabang sa mga nagtanum og tubo didto sa lungsod sa Medellin, upat ka mga corn-drying facilities ang ibutang sa Probinsya sa Sugbo ngadto sa maong lungsod.

Suma pa ni Cebu Governor Gwendolyn Garcia nga kini maoy pag-abag sa Kapitolyo sa mga mag-uuma sa tubo nga mo transition sa pagpananom og hybrid yellow corn.

Ang matag pasilidad makapauga og 15 metriko tonelada nga lugas sa mais sulod sa matag 10 ka oras o 30 ka metric tons sa lugas sa mais sulod sa 24 oras nga operation cycle.

Ang maong mga pasilidad makatabang sa pagdugang sa gikinahanglan sa mga dagkong buyers sa mais sa lalawigan.

Ang Provincial Agriculturist nga si Rolden Saragena nagkanayon nga ang mga corn dryers ibutang sa Barangay Caputatan Sur sanglit dali ra kini nga maadtuan sa mga silingan nga LGU sama siyudad sa Bogo, Daanbantayan, San Remigio, Tabogon ug Tabuelan.

Matud ni Saragena nga matag mag-uuma makaharvest og walo ka metriko tonelada nga mais matag ektarya.

Niadtong Septiyembre sa niaging tuig, si Garcia maoy nangulo sa ceremonial nga pagpananom og hybrid yellow corn sa 50 ka ektarya nga luna didto sa Brgy. Caputatan Sur. —  MEL ( Banat News )