Namusil gamit ang airsoft rifle gidakop sa Carcar

CEBU, Philippines — Gidakop ang usa ka 49 anyos nga lalake human kini namusil gamit ang airsoft rifle nga miresulta sa pagkaangol sa 23 anyos nga biktima niadtong miaging adlaw sa sitio Hinagdanan, Barangay Calidngan, Dakbayan sa Carcar.

Ang suspek giila nga si Crescente Satuita Embalzado ug ang biktima mao si Kim Gordones, diin ang duha pulos residente sa naasoy nga lugar.

Sa report sa Carcar City Police Station pinangulohan ni Police Lt. Col. Ardioleto Cabagnot nga nangayo og police assistance ang usa ka concerned citizen labot sa kagubot nga nahitabo sa dapit.

Nasuta sa imbestigasyon sa kapolisan nga ang dinakpan kinsa gituohang nakainom nasuko nga gibalhin ang iyang motor hinungdan nga mikuha kini sa iyang airsoft rifle ug mipusil sa biktima.

"Hubog kay tong namusil unya giingnan siya sa igsuon nga ihatod nalang nag motor kay hubog ba basin madisgrasya, dili na siya padraybon, unya hubog siya, naalimungan siya pagtan-aw niya asa iyang motor ingon iyang uyuan nga gibalhin nako lagi kay dili na siya pa draybon...niuli siya sa ilaha nikuha sa airsoft, napusilan niya sa paa", suma pa ni Lt. Col. Cabagnot.

Nakuha sa kapolisan ang gigamit nga airsoft rifle ug sa pagkutlo ning balita wala pa nakagawas sa prisuhan ang dinakpan. (BANAT NEWS)