“Happy Water” cocktail peligro nga drugas - COSAP

CEBU, Philippines — Bag-ong matang sa ilegal nga drugas nga gitawag og “happy water” gikatahong hinay-hinay ng nikatap sa ubang mga lugar gikabalak-ang makaabot sab dinhi sa siyudad.

Gibutyag sa Executive Director sa Cebu City Office for Substance Abuse Prevention (COSAP) nga si Jonah John Rodriguez nga sa sunod tigom nila sa  Philippine Drug Enforcement Agency (PDEA) ug Phillippine   National Police  (PNP) ug City Anti-Drug Abuse Council (CADAC) kay iyahang ipaapil sa diskusyon kining  gitawag og “happy water” .

Hinuon gitataw ni Rodriguez nga wala pa’y report nga naabot na dinhi sa Sugbo ang maong klase nga ilimnong drugas. Nahisgotan lang ang kalabot sa “happy water” atol sa gitambongan niya nga anti-illegal drugs forum didto sa kaulohan nga gitambongan sa nagkalain-laing personalidad sa nasud nga gikan sa anti-illegal drugs community .

Matud pa ni Rodriguez nga usa sa gisulti sa speaker sa maong forum nga kinahanglan nga magmatngon ang katawhan sanglit peligro ug grabe ang negatibong epekto sa maong bag-ong ilegal nga drugas sa lawas sa tawo.

“Wala pasad na natuki kun unsang lugara nagikan ang maong klase nga drugas ,” matud pa ni Rodriguez sa pakighinabi niini sa Banat News kagahapon.

Matud pa niya ang maong matang sa ‘drug cocktail’ gikan sa gisagol-sagol nga klase-klaseng illegal drugs  sama sa ecstacy, methamphetamine,  diazepam, caffeine, tramadol ug  ketamine. Kining maong mga kemikal duna tagsa-tagsa ka negatibong epekto sa lawas sa tiggamitan niini, samot na kun kini usahon ra og inom.

Gitambagan niya ang katawhan ilabi na kadtong mahiligon kaayo sa mga disco party nga dili magpataka og dawat og tagay ilabi na sa dili nila kaila. —Sanden J. Anadia/IBM

CVIRAA meet malinawon, matud sa Carcar Police Station

Ang kapulisan sa Dakbayan sa Carcar mipahibalo nga wala pay natala nga bisan unsa nga mga panghitabo samtang nagpadayon ang pagpahigayon sa Central Visayas Regional Athletics Association (CVIRAA) Meet.

Si Police Lt. Col Ardioleto Cabagnot ang hepe sa Carcar City Police Station miingon nga hugot ang ilang pagbantay dili lang sa iyang mga ginsakopan, apan lakip na usab sa gipadalang dugang pwersa sa Police Regional Office-7.

Dunay gibanabanang kapin sa 400 ka mga polis ang gi-deploy sa maong siyudad alang sa kasigurohan sa mga delegadong nanambong.

Sumala pa ni Cabagnot, gikan sa pagsugod sa pagbukas sa CVIRAA, wala pa silay nadawat nga bisan unsa nga mga panghitabo ug maoy ilang panghinaut nga hangtud kini mahuman.

Gibutyag ni Cabagnot, nakig-alayon usab sila sa mga kadagkuan sa mga delegado nga unta magmatngon usab sila sa ilang mga kagamitan ug dili lang usab mokompyansa bisan anaa ang presensya sa kapulisan kay ang mga badlongon mangita ra man gayud ug kahigayonan nga makabiktima.

Gitug-an ni Cabagnot, adunay mga polis nga gipahimutang sa mga venue ug sa mga lugar nga adunay mga nagpuyo nga mga players para sa kaluwasan sa tanan. (BANAT NEWS)