Rambol sa moalboal
CEBU, Philippines — Pipila ka mga basketball players sa Cebu Institute of Technology –University Wildcats ug University of Cebu Webmasters ang nagkarambola human sa ilang mainiton nga duwa sa Moalboal niadtong Domingo sa gabii.
Ang maong nga tunghaan miapil sa Mayor Inocentes Cabaron Inter-Collegiate Invitational Basketball Tournament nga gipahigayon sa Municipal Gym sa Barangay Poblacion West.
Matud pa ni Police Captain Elmond John Mondaya, hepe sa Moalboal Municipal Police Station samtang gasige pa ang duwa nagkapisikalay na ang mga players hangtod nga midaog sa maong duwa ang UC Webmasters.
Pagkahuman sa duwa naglamanohay pa ang mga players apan sa ilang paggawas sa gym nag-abot sila pagusab ug gikatahong nagpasingitay gihapon og estorya nga miresulta sa ilang pagsinumbagay.
“Ang duwa nila medyo nagka-pisikalan, karon nahuman na ang duwa nag shake hands pa ang mga players kay daug na ang UC nag abot ang mga players gate sa Moalboal (gym), unya didto nagsige gihapon pasingit-singit og estorya, naka cause to og komosyon unya wala na gyud mapugngi ang uban players nag rumble na gyud sila,” sigon ni Mondaya.
Matud pa niya daghan sa mga players ang nalambigit sa maong komosyon apan tag tulo kada habig ang midangop kanila ug parehong nangreklamo.
Matud pa ang mga players sa UC Webmasters maoy nag pa blotter sa Police Station bahin sa nahitabo. Ang uban wala na magpa blotter.
Ang mga players nga giingong nalambigit sa maong komosyon giila ni Mondaya gikan sa habig sa CIT-U mao sila si Eduard Clarete Jr., 23, Key Darang Suano ug Coach Edsel Vallena, 51.
Sa habig sab sa UC players mao sila si Niño Teff Atunay, Joseph Nalos ug amahan niini nga si Josephairo Nalos, 49.
Dugang ni Mondaya nga sa ilang imbestigasyon nga si Joseph Nalos naigo ug nasamad atol sa duwa.
Matud pa ang duha ka kampo parehong mipadayag nga mopasaka og kaso batok sa usa’g-usa.— Decemay Padilla (BANAT NEWS)
- Latest
