Mga bay patigayon sa Ginatilan pabutangan na og CCTV

CEBU, Philippines —  Kinahanglan na nga magbutang og video surveillance camera kon closed-circuit television (CCTV) ang mga bay patigayon sa lungsod sa Ginatilan.

Kini human gipasar sa Sangguniang Bayan sa lungsod ang ordinansa nga gitumong aron makatabang sa pag-ila sa mga responsable sa krimen o bisan unsa nga dautang buhat.

Ang ordinansa gipangamahanan ni konsehal Kirby Cesar Ibo nga gitawag og “The CCTV Camera Ordinance”

Sa maong lokal nga balaod sa lungsod ang mga establisamento sa Ginatilan sama sa mga banko, automated teller machines (ATM), money changers, pawnshops, credit facilities, ug susamang mga lending ug financial institution gimanduan na pagbutang og CCTV.

Nalatid sa balaud nga ang tanang business establishments nga dunay initial capital nga moabot sa P250,000 o sobra pa ang gi-require sa pag install og CCTV cameras ug kinahanglan nga ibutang kini sa mga lugar nga dunay dakung risgo sa katawhan.

Samtang ang establisamento nga dunay initial capital nga moabot lang og ubos sa P250,000 ang voluntary lamang ang pagbutang og CCTV segun sa ordinansa.

Ang mga skwelahan mapribado man o pampubliko nga nahimutang sa national highway ang apil niini ingon man ang tanang local government agencies, buildings ug bisan ang mga lugar nga daghan og tawo sama sa merkado, parking areas plaza ug uban pa.

Kinahanglan ang maong CCTV surveillance camera mag operate 24 oras kon diin magbutang sab og pahibalo ang establisamento nga aduna kini gibutang nga CCTV aron masayod ang publiko.

Ubos sa maong balaud, gitahasan ang Business Permit and Licensing Office (BPLO) ug Ginatilan Police Station sa pag-assist sa pagpatuman sa maong ordinansa.

Ang maong CCTV cameras magamit alang sa law enforcement ug crime prevention ug pagmonitor sa dagan sa trapiko.

Ang makalapas sa maong ordinansa mamahimong mamultahan og 500 ngadto sa P1, 500. Le Phyllis F. Antojado/MEL

Pagdili sa paggamit og plastic subling ipatuman sa Danao

Subling ipatuman karong Hunyo 1, 2023 sa lokal nga kagamhanan sa siyudad sa Danao ang ordinansa nga nagdili sa paggamit og plastic bags alang sa dry goods ug pag regulate sa mga gamiton nga putos sa wet goods.

Sa nasayran ang maong ordinansa temporaryong una nga gihunong tungod sa pandemya sa COVID-19.

Sumala sa Executive Order ni Mayor Thomas “Mix” Durano, gidid-an ang mga establisamento sa paggamit sa plastic bags ngadto sa mga customers isip secondary packaging material sa wet goods; pagbaligya ug paghatag og plastic bags sa mga customers isip packaging materials sa dry goods ug paglabay sa plastic waste.

Ang mga establisamento nga nagbaligya og wet goods mahimong makagamit og plastic bags nga maoy iputos sa baligya apan way gitugutan nga patigayon nga mogamit og plastic aron iputos sa mga dry goods.

Ang makalapas sa maong lokal nga balaod mamahimong mamultahan og P1, 000 sa first offense; P2, 000 sa second offense ug P5, 000 sa third offense ug posible sab nga mapriso og unom (6) ka bulan. — MEL ( Banat News )