Talisay mopahigayon og offsite registration sa sim card

CEBU, Philippines — Gipahibawo ni Talisay City Mayor Gerald Anthony “Samsam” Gullas, Jr. nga adunay ipahigayon nga offsite registration sa mga sim card alang sa mga Talisaynon.

Kini isip tubag sa hangyo sa mga Talisaynon nga hangtud karon wala pa kini nakaparehistro sa ilang mga sim card.

Sayo pa, ang Department of Information and Communications Technology (DICT) nipahibawo nga wala nay lugway sa deadline alang sa pagrehistro sa sim card ug ang katapusang adlaw mao ang Abril 26 niining tuiga.

Si Konsehal Eduardo “Digul” Gullas III maoy nakigtagbo sa taga Telcos aron himuon nga offsite registration.

Si Konsehal Gullas ang nihangyo ngadto sa mayor aron himuon ang kalihokan samtang sayo pa ug wala pa maabot ang deadline.

Sunod semana gipahibawo ni Gullas nga mao na kini tubag sa hangyo sa katawhan aron daghan na ang makaparehistro.

Ang 57-anyos nga barangay tanod sa Poblacion naguol gumikan kay wala pa siya nakaparehistro tungod kay keypad nga cellphone lang ang iyang gamit ug ang pagrehistro kinahanglan nga android nga cellphone ang gamiton.

Lakip ang mga tinun-an sa Talisay City College (TCC) ang nabalaka tungod kay lisod alang kanila makakuha og koneksiyon sa internet aron makaparehistro.

Ug matud nila nga dakong gamit sa ilang pagtungha ang ilang cellphone.

Matud ni Konsehal Gullas nga unta mapahimuslan ang offsite registration tungod kay alang kini sa mga nagkaproblema sa pagrehistro sa ilang sim card ilabi na ngadto sa mga senior citizen ug dili kaayo suhito sa mga gadget ug internet.  – BDB (BANATNEWS)