DOE-Visayas: Supply sa kuryente paigo pa

CEBU, Philippines — Ang Department of Energy-Visayas nangandam na karon sa posibleng epekto sa El Niño phenomenon sa industriya sa enerhiya dinhi sa rehiyon.

Matud pa ni Engineer Jose Rey Maleza, pangulo sa Energy Management Industry Division of DOE-Visayas, pipila sa ilang mga gihimo mao ang pagsiguro nga tanang power plants maayo ang pagkahimutang ug lakip usab sa ilang distribusyon.

Dugang pa ni Maleza, ila usab gipinalisar ang ilang contingency plans kung ingkaso adunay mga untoward incidents nga mahitabo.

Gibutyag ni Maleza, anaa pa sa normal status ang power supply sa rehiyon.

Sumala pa ni Maleza, ang ilang reserve nga supply, wala pa sa critical level bisan pa man sa lakat sa panahon karon nga ting-init kay wa paman sab mosaka og maayo ang demand.

Apan malaumon si Maleza nga  madugangan ang power supply sa rehiyon gikan sa Mindanao connection kay ang Visayas Grid ug Mindanao Grid sa National Grid Corporation of the Philippines nakakonektar na karon ug nagpaabot nalang sila sa NGCP kung unsa nay status niini.

Sa pikas bahin, ang buhatan ni Konsehal Danny Caballero, kinsa chairman sa disaster resiliency sa Dakbayan sa Talisay mipahibalo sa mga nanimuyo sa kabukiran nga pahibaw-on sila kun naglisod na sila sa supply sa ilang tubig.

Si Caballero miingon nga mahimo ra silang moduol ngadto sa City Disaster Risk Reduction and Management Office ug kabumberohan labot sa ilang hangyo. Apan siya mihangyo sa tanan nga karong panahon sa ting-nit maayong magdaginot ang tanan og tubig.

Ning bag-ohay lang, 30 ka mga panimalay sa C1 Heights Purok Kolo, Barangay Jaclupan nipadala og suwat kang Caballero nga naghangyo nga maginstalar og linya sa tubig sa ilang lugar.

Si Caballero miingon nga posibleng mahatag nila kini sa dili pa matapos ang buwan. — Gabriel Bonjoc IBM ( Banat News )