Caregiver giduslak sa uyab nga selosa
CEBU, Philippines — Nalandig sa tambalanan ang 40 anyos nga caregiver human siya giunay sa pagdunggab sa iyang uyab nga masahista diha sa Barangay Bulacao, Dakbayan sa Talisay niadtong Miyerkules sa hapon.
Ang biktima mao si Radney Plan, 40 anyos nga nagpuyo sa nahisgutang lugar. Samtang ang suspek mao si Melody Mar Navaja, 46, usa ka massage therapist nga taga Barangay Labangon, Syudad sa Sugbo.
Si Police Lt. Col. Randy Caballes, hepe sa kapolisan niingon nga nag inom ang duha diha sa pinuy-anan sa biktima.
Apan kalit lang nga nikuha og hinagiban ang suspek ug gidunggab si Plan.
Ang biktima gidala sa Cebu South Medical Center samtang gidakop ang suspek. Ang biktima minyo nga adunay tulo ka anak apan buwag na sa iyang asawa sud sa 10 ka tuig.
Samtang ang suspek adunay kapuyo kaniadto nga adunay upat ka anak pero buwag nasab kini.
Nagpuyo ang duha sud na sa lima ka tuig ug adunay estorya nga selosa ang suspetsado.
Si Caballes niingon nga ila pa nga gipaabot ang biktima kung mopasaka ba gyud og kaso sa suspetsado.
Base sa nakuha nga impormasyon, adunay rekord ang biktima nga nadakpan sa kaso nga alarm and scandal niadtong Mayo 27 tuig 2020. Ang suspek nga si Navaja mao ang nagpyansa.
Sa pagsuwat ning balita, dili mo kooperar ang suspek sa kapolisan hinungdan nga sila nirekomendar sa pagdala ani sa Vicente Sotto Memorial Medical Center aron sa pagsusi sa iyang pangisp. (BANATNEWS)
- Latest
