Demolisyon diha sa Donya Pepang himoon karong adlawa
CEBU, Philippines — Himoon na karong adlawa, Abril 12, 2023 ang demolisyon sa mga barong-barong nga gitukod diha sa Donya Pepang cemetery.
Suma pa sa assistant on special projects ni Mayor Michael Rama nga si Ramil Ayuman nga dunay 13 ka mga barong-barong ang gikatakdang gub-on. “Hinuon dunay upat niini ang boluntaryong niguba sa ilang barong-barong,” suma pa ni Ayuman dihang nahinabi sa Banat News.
Subay niini nihimo og lapad nga coordination meeting ang Prevention, Restoration, Order, Beautification and Enhancement (PROBE), Waterfront Police Station, ug Cebu City Transportation Office alang sa pagahimoon nga operasyon.
Gilugwayan ang gitakdang demolisyon sa maong illegal settlers human molapas ang tagal niini niadtong Abril 4 gumikan sa Semana Santa.
Human sa demolisyon sa mga barong barong isunod dayon ang paghatag og notisya ngadto sa 37 ka mga balay nga naa sa maong area.
Hinoun iduso lang ang notisya sa higayon nga maandam na ang giplano nga relocation site diha sa Barangay Quiot ug mao kini ang giasikaso karon sa Cebu City Division for the Welfare of the Urban Poor (DWUP).
Kahinumdoman nga giaprobahan na ni Mayor Michael Rama ang desinyo alang sa pag-convert sa Donya Pepang ngadto sa usa ka heritage park.
Usa sa kamandoan sa mayor nga mahuman na kini karong Hunyo 12 ug ang maong proyekto maghatag og dugang atraksyon dinhi sa Dakbayan. MEL (BANATNEWS)
- Latest
