Kompetisyon sa tabanog gihimo sa siyudad sa Carcar­­

Gidumog sa mga tawo nga gustong mosaksi ang labing una nga kompetisyon sa tabanog diha sa Barangay Guadalupe, Dakbayan sa Carcar niadtong Biyernes Santo.

Miabot sa 60 ka mga entrante ang nipakita sa katulin ug pinakalahi nga desinyo sa ilang mga tabanog.

Si konsehal Rey Anthony Lawas sa barangay Guadalupe maoy nangulo sa kalihukan diin siya nipasabot nga lahi na ang kabataan karon nga nagsige nalang og atubang sa ilang mga cellphone.

Sa iyang kapanahonan iyang nahinumdoman nga sa buwan pa lang sa Enero daghan na siya nga makitang nagkalain-laing tabanog pero karon nausab na hinungdan nga siya naikag nga ibalik kini pinaagi sab sa pagpahigayon og kompetisyon.

Nalipay siya nga daghan ang nalingaw ug nakita sab ang ka maayo mohimo og desinyo sa mga entrante.

Ang nakadaog nakadawat og P2mil pesos samtang ang pinakatulin nakadawat og usa ka libo ka pesos ug bugas ug ang uban nakadala og P200 pesos.

Iyang gipasalig nga himuon niya kini matag tuig ug dili lang taga Guadalupe, Carcar ang makaapil aron mas alegre ug monindot pa gyud ang kompetisyon sa tabanog. —  MEL (BANAT NEWS)