Maanindot nga pasundayag sa “Buhing Kalbaryo” gipaabot

CEBU, Philippines — Ang hugyaw nga produksyon ug sa susamang higayon, ang lapad nga pamalandong ug magsilbing inspirasyon sa kadaghanan maoy usa sa ipatigbabaw sa ika-26 nga pagpasundayag sa Buhing Kalbaryo karong Biyernes Santo, Abril 7,2023.

Una na nga gihulagway sa executive director sa maong kalihokan nga si Jojo Labella nga usa kini ka “Dula sa Pangamuyo”.

Suma pa ni Labella dihang nahinabi sa Banat News nga angayan gyud kini nga atangan gumikan kay dili basta-basta ang performance sa 130 ka mga artista niini.

Ang “Buhing Kalbaryo” maoy re-enacment sa kaagi ni Hesus paingon sa iyang kamatayon sa krus.

Ang dula magsugod sa buntag sa Archdiocesan Shrine of San Nicolas de Tolentino ug mosubay kini paingon sa V. Rama hangtud sa Espina Compound sa Barangay Guadalupe.

Magbutang usab ang kagamhanan sa siyudad sa Sugbo og igong gidaghanon sa security ug medical personnel.

Kahinumdoman si Mayor Michael Rama maoy nagpasiugda sa Buhing Kalbaryo niadtong 1997.

Samtang giawhag ni Archbishop Jose Palma ang mga magtutuo nga motambong sa mga linawas nga kalihukan sa simbahan ug dili lang kutob sa mga online mass.

Sumala pa sa Arsobispo, human gibuksan ang mga kalihukan sa simbahan angayan na usab mosimba ang mga tawo diha na sa simbahan ug mohimo na usab sila sa ilang mga kanhi bulohaton sama sa pag rosaryo, novena ug uban pa.

Dugang ni Palma nga ang mga online masses alang lamang sa mga tigulang nga dili na kahimo sa pag adto sa simbahan, adunay gihambin nga sakit ug kadtong adunay mga emerhensya nga gimbuhaton. /MEL (BANAT NEWS)