300 ka bakhaw gitanum sa Barangay Dumlog sa Talisay

CEBU, Philippines — Miabot sa 300 ka mga binhi sa bakhaw ang gitisuk sa kapolisan sa Dakbayan sa Talisay didto sa baybayon sa Barangay Dumlog, niadtong miaging adlaw.

Ang kapolisan inubanan sa kababayen-an sa barangay Dumlog, Violence Against Women (VAW) officer ug GAD focal nihimo niini isip tipik sa programa sa Women’s Month. Si Police Lt. Col. Randy Caballes, hepe sa kapolisan nitataw nga ang kalihukan nitunong sa ilang gitamod nga kawsa nga mao ang pag atiman sa kalikupan.

Matud pa niya nga dili lang katawhan ang ilang giprotektahan kundi lakip nasab ang kinaiyahan nga mao sab ang gisaligan sa tanan.

Ilang paningkamotan nga ang mga binhi motubo ug modako tungod kay dako kini og matabang sa namuyo sa dapit alang sa pagprotektar kanila sa dagkong bawod.

Mao sab kini ang magsilbi nga kaitlogan sa mga isda ug kapundohan sa uban pang klase nga mananap sa kadagatan.

Ilang gipanghinaot nga unta ang mga residenti motabang sa pag atiman sa mga bakhaw kay ang gihimo nga kalihukan alang sa pagtabang sa nagpuyo sa dapit. — MEL (FREEMAN)