‘Manghingiay’ sa mango gihipos
CEBU, Philippines — Na-rescue pinaagi sa hiniusang operasyon sa Abellana Police Station 2 ug City Social Welfare and Development ang 23 ka mga tawo diha sa Mango Square Avenue ug Juana Extension, Barangay Kamputhaw ning siyudad subay na pagpatuman nila sa anti-mendicancy ordinance o City Ordinance 1631 sa kagamhanan sa siyudad sa Sugbo.
Si Police Major Nolan Tagsip, hepe sa Abellana Police Police Station 2 sa Cebu City Police Office nga gipatuman nila ang City Ordinance 1631 gumikan sab sa sunod-sunod nga reports nga ilang nadawat labot sa mga kababayen-an ug kalalaken-an nga giingong sige og pangayo sa naasoy nga dapit maong nagpahigayon sila og rescue operations.
“Mostly ani nila mangayo either sa atong foreign or local unya naka-receive ta og information ana and then there were series of complaints regarding ani so we take action on that,” asoy ni Tagsip.
Sa 23 nga na-rescue sa kapulisan, 19 niini babaye ug upat ang lalake, sila gi-isyuhan og citation ticket sa kalapasan sa Anti-mendicancy law diin ang multa niini P500 dayon gi-turnover sa CSWS office ss South Road Properties ug gipaubos og intervention program.
“During sa rescue operations it was witness and kauban nato ang CSWS for further intervention,” ni Tagsip pa.
Usa sa tumong sa pag-rescue nila nga malikayan sila matintal nga makabuhat og mas bug-at nga sala sama sa pagpangawat ug pagpanulis.
Gumikan kay mao kini ang unang pag-rescue kanila gipaubos sila og seminar sa kapulisan diin gi-edukar sila labot sa maong ordinansa.
Si Tagsip miingon nga dili sila mohunong sa pagpahigayon og sama niini nga operasyon ilabi na kun makadawat nasab sila og mga report nga dunay mga “manghingi” o mangayo-kayo sa mga lumalabay sa maong dapit.
“We send a strong message to them dili na pwede ilang ginabuhat,” matud ni Tagsip. (BANATNEWS)
- Latest
