24 na ka sunog ang natala sa siyudad gikan sa Marso 1
CEBU, Philippines — Sulod sa tibuok buwan sa Marso nga mao sab ang fire prevention month ang Cebu City Fire Station nakatala og 24 ka sunog gikan sa Marso 1 hangtud sa petsa 23 ning tuiga.
Sa data nga gihatag sa Cebu City Fire Station sa petsa 1 sa buwan sa Marso usa ka sunog ang natala; petsa 2 ug 4 duha ka sunog ang niigo; usa sab sa petsa 6; duha sa petsa 7; usa sa petsa 8 ug 9; tulo ka sunog sa petsa 10; usa sa petsa 14; lima ka sunog ang natala sa petsa 17; usa petsa 21; duha sa petsa 22; ug usa sa petsa 23.
Ang sunog miigo sa Barangay Mambaling, Sambag II, Tisa, Sambag 1, Inayawan, Guadalupe, Basak San Nicolas, Labangon, Kamputhaw, Kalunasan, Sapangdaku, Punta Princesa, Apas, Sta. Cruz ug Mabolo.
Ang mga naapektuhan sa maong sunog mga residential, non-residential ug transport.
Nasayran sab nga ang 24 ka sunog nga niigo sa pipila ka barangay sa dakbayan sa Sugbo midanyos og P11.5 million.
Ang Cebu City Fire Station wala’y hunong nga nagpahinumdom sa publiko nga magmatngon kanunay sa sunog gani daghan sila’ng kalihukan nga gipahigayon subay na sa Fire Prevention aron ang katawhan masayod kun unsaon paglikay sa sunog ingon man unsay buhaton sa higayon nga dunay motumaw nga sunog. (BANAT NEWS)
- Latest
