Ramadan night market gibuksan kagahapon

CEBU, Philippines —  Gibuksan na kagahapon ang labing una nga Ramadan night market diha sa dalan Colon.

Mao kini ang usa sa mga kalihokan sa kagamhanan sa Siyudad sa Sugbo isip pagtimbaya ug pahinungod sa mga kaigsuonang Muslim.

Tipik sa night market gilahi ang area alang sa mga namaligya og mga halal food.

Matud sa chairwoman sa Garbo Asenso Sumbanan Alyansa (GASA) Maria Pino nga moabot sa kapin sa 300 ka vendors ang naglangkub sa night market ug dul-an sa 70% niini kay mga Muslim.

Kaabag sa kagamhanan sa Siyudad sa Sugbo sa maong kalihokan ang Office of Muslim Affairs.

“Unsay nakalahi sa atong night market karon? Atoang food court karon, ato nang gitarong og han-ay. Ang atong mga kaigsuonang Muslim, ato gyud gibutangan og ilang kaugalingon nga kan-anan (halal). Ato gyud nga i-showcase ang kultura sa atong Muslim brother and sisters”,matud ni Pino atol sa press conference kagahapon.

Magsukod ang night market gikan sa alas 6:00 sa gabii hangtud sa alas 2:00 sa kadlawon matag Biyernes, Sabado ug Dominggo diin hangtud na kini sa buwan sa Abril niining tuiga.

Nasayran nga nahimo na nga kabahin sa kasaysayan ang Colon diin mao kini ang  labing karaang dalan sa nasud.

Sa nangaging night market niadtong buwan sa Disyembre nikita ang siyudad og P1.3 milyon gikan sa mga arkabala.

Gipaniguro usab sa kapolisan ug sa mga tinugyanan sa Cebu City Transportation Office nga mapatuman ang kahapsay ug kalinaw sa dalan Colon.  (BANAT NEWS)