Osmeña Boulevard dili una pahunongan og sakyanan
CEBU, Philippines — Gihangyo sa Cebu City Transportation Office ang mga motorista nga likayan ang "loading" ug "unloading" sa pipila ka bahin sa Osmeña Boulevard diin nagpadayon ang konstruksyon sa Bus Rapid Transit (BRT) project aron dili mosamot kahuot ang dagan sa trapiko.
Suma pa ni Paul Gotiong, ang nangulo sa public mass transportation division sa Cebu City Transportation Office (CCTO), nga duha nalang ka lanes ang kasamtangang maagian sa maong dalan sukad gisugdan ang phase 1 sa maong proyekto sa niaging buwan.
Matud pa niya nga maminusan gamay ang kahuot sa trapiko sa maong dapit kun dili mohunong sa maong dalan ang mga sakyanan.
“For the commuters also, I wanted to emphasize kay mao among nabantayan bitaw, ayaw lang sa mo og sakay or hunong diha," matud pa ni Gotiong atol sa Panaghisgot’ forum.
Suma pa niya nga importante kaayo ang kooperasyon sa katawhan aron dili mosamot ang problema sa trapiko.
Gitambagan usab ang mga pribadong sakyanan nga mangita og alternatibong rota aron dili kini makatampo sa volume sa sakyanan nga moagi sa maong dalan.
Pipila sa mga alternatibong dalan mao ang V. Rama, dalan Jakosalem, dalan Ramos ug uban pa.
Kahinumdoman nga gihimo niadtong Pebrero 27, 2023 ang ceremonial groundbreaking sa BRT Project. (BANATNEWS)
- Latest
