Mga tinun-an “nasudlag” dautang espiritu

CEBU, Philippines —  Mga tinun-an sa Patupat National High School sa Lungsod Barili ang gikatahong nag mass hysteria nga gitawag sa uban nga nasudlag dautang espiritu kagahapon sa buntag.

Si Fr. Reynaldo Cui, kura sa paruko sa Parokya ni San Jose, Madridejos Alegria Cebu ug usa sa mga exorcists sa Archdiocese of Cebu miingon nga ang nahitabo sa mga tinun-an gitawag sa simbahan og Demonophatic Hysteria Madness.

Matud pa ni Cui  dunay relihiyosong kalihokan unta nga buhaton sa maong tunghaan anang adlawa sama sa pag-blessing sa lugar ug dunay Santos nga Misa nga pagahimuon nga pangulohan ni Msgr. Danny Sanico, Team Moderator sa Team of Pastor sa Sta. Ana Parish, Barili.

Apan nalangay sa pag-abot si Fr. Sanico tungod sa gilay-on sa tunghaan gikan sa iyang gigikanan na late siya gamay.

Si Cui miingon nga apil siya sa maong kalihokan apan sa iyang pagabot giingong nakamatikod kini og talagsaong huros sa hangin.

Sunod nga nahitabo ang mga batang babaye nangakuyapan ug nag-hysteria maong nagka-komosyon.

Tungod niini wala na madayon ang Santos nga Misa ug sila ni Fr. Monico Catubig, pari sa Sto, Rosario Parish sa Cebu City nag-ampo samtang si Msgr. Sanico nipakompisal sa mga tawo ug mga tinun-an nga tua didto.

Gibutyag ni Cui nga ang maong panghitabo nagsugod sa nilabay nga semana atol sa camping sa mga tinun-an dihang giingong duna silay nakitang katingalahan nga ilang gipasa-pasa sa social media. Mao kini ang rason nga misahan unta ang dapit.

Si Cui, niawhag usab sa mga ginikanan sa pagpaminaw sa ilang mga anak  ug ipahunong ang pagpasul-ob og mga habak-habak sa ilang mga anak ug tudloan ilang mga anak mag-rosaryo inay magpuwaw sa mga cellphones mao nga ang uban hago ang lawas ug daling ma-stress ug nerbiyoson.—  IBM (BANATNEWS)