Idlas nga drug pusher nadakpan

CEBU, Philippines —  Usa ka gipasanginlang notorious nga durugista nga dugay nang gipangita sa kapolisan niadto pang tuig 2020 tungod kay gikatahong idlas kini kaayo, nahulog ra gyud sa mga kamot sa otoridad.

Ang suspek nga si June Albert Ylaya alyas “ Pangit” ,24, naposasan ra gyud atol sa gipahigayon nga buybust operation sa City Drug Enforcement Unit sa Cebu City Police Office pinangulohan ni Police Lieutenant Colonel Dindo Juanito Alaras.

Nahitabo kini diha sa Sitio Lahing-Lahing 2,Barangay Mabolo sa Siyudad sa Sugbo niadtong Sabado sa gabii.

Si Ylaya gikonsiderar nga High Value Individual Regional Level og anaa sa Drug watchlist sa kapolisan.

Si Police Colonel Ireneo Dalogdog , City Director sa Cebu City Police Office mitug-an nga si Ylaya aduna say kalambigitan sa mga nahitbaong pagpamusil sa Barangay Carreta.

“Kini pud siya involved sa series of killings ilabi na didto sa Barangay Carreta,”sigon ni Dalogdog apan wala na mohatag pa og dugang detalye bahin niini.

Si Ylaya gikatahong adunay mga kaubanan sa illegal nga negusyo nga mao sila si Roberto Cado Ludong alyas “ Badmax” nga responsable sab sa mga shooting incidents diha gihapon sa Barangay Carreta nga padayon pa karong gipangita.

Matud pa ni Dalogdog nga naay confidential informants nga maoy naghatag og reliable information bahin ni Ylaya hinungdan nga gilusad ang maong operasyon.

“Naay confidential informant nga nag hatag og reliable information sa operatiba na fortunately naka transact jud ta. They were able to transact nadakpan jud ni ang kining maong suspek,”sigon ni Dalogdog.

Sa ilang pagimbestigar sa suspetsado nasayran nga ang source niini sa illegal nga drugas nagagikan sa usa ka ginganlan og “May-May” nga matud pa napriso karon sa Cebu City Jail.

Atol sa operasyon nakuha gikan sa dinakpan ang 17 ka medium nga paketeng tag tag singko gramos , tulo ka tag 25 gramos ug tulo ka tag 100 gramos nga tanan gituohang shabu nga gisulod sa sling bag.

Motimbang kini tanan og 470 gramos nga mobalor dul-an P3.2 milyones ug nakuha sab gikan niya ang buybust money nga P12,000.

Ang dinakpan pasakan og kasong kalapasan sa RA 9165 Comprehensive Dangerous Drug Act of 2002.(BANAT NEWS)