Carcar City Sports Complex giayo, agig pag-andam sa CVRAA

CEBU, Philippines — Gisirhan una sa mag ehersisyo ang Carcar City Sports Complex aron ayuhon ang pipila ka parte niini isip pagpangandam sa ipahigayon nga Central Visayas Regional Athletic Association (CVIRAA) nga himuon karong buwan sa Abril.

Si mayor Patrick Barcenas nakigtigom sa kadagkuan sa Department of Education (DEPED) alang sa paghost sa Carcar sa kalihukan sa paugnat sa kusog.

Lakip sa giayo mao ang rubberized floor sa track oval, swimming pool, soccer field, grand stand ug diving pool.

Ang sports complex nabuksan niadtong buwan sa Disyembre tuig 2021 panahon ni kanhi mayor Nice Apura.

Sa pagbukas sa sports complex gigamit na dayon kini sa Carcaranon nga gusto nga magpasingot.

Gipaabot ang 20 mil ka partisipante nga gikan sa tibuok rehiyon nga mosalmot sa CVIRAA.

Sa laing bahin tinguha sa kadagkuan sa Maximino Noel Memorial National Highschool sa Barangay Guadalupe, Syudad sa Carcar nga makahimo og maayong atleta.

Apan ang babag sa ilang pangandoy mao ang kakuwang nila og kahimanan alang sa paugnat sa kusog.

Subay niini ang grupo sa mga batan-on nga gitawag og REY Organization dali nga nihatag og sports equipments sama sa bola sa basketball, volleyball, volleyball net ug uban pa.

Nihatag sab sila og polo shirts alang sa uniform sa ilang mga tinun-an sa grade 12 nga mopaubos na sa On Job Training (OJT).

Si konsehal Rey Anthony Lawas, kinsa maoy founder sa organisasyon nitataw nga ang kaayohan sa mga batan-on ang ilang tinguha.

Matud pa ni Lawas nga magamit gyud kaayo ang ekipo alang sa pagbansay sa mga tinun-an ug sila malikay sa dili maayo nga bisyo.

Si Lordjim Lauronilla Alcuizar, principal sa tunghaan dako ang pasalamat sa REY organization sa pagtubag sa ilang gikinahanglan alang sab sa 200 ka mga kabataan sa ilang tunghaan. — /MEL (BANAT NEWS)