Snatcher sikop human nisukol ang iyang biktima

CEBU, Philippines —  Usa ka giingong notadong snatcher ang nasikop human ang iyang gilabnihan nga call center agent nisukol kagahapon sa buntag diha dapit sa GSIS Building sa dalan Leon Kilat, Siyudad sa Sugbo.

Nagtingkagol sa detention cell sa Carbon Police Station si Orlando Epogon Amarillo, hingkod ang panuigon, lumad nga taga Barangay Obaob, Lungsod sa Argao ug kasamtangang nagpuyo diha sa Bontores, Dakbayan sa Talisay.

Ang biktima kinsa nakaangkon og pangus sa lawas mao si Richelle Arnaiz Lorenzo, hingkod usab ang panuigon, call center agent, nagpuyo diha sa dalan Urgello, Barangay Sambag 1, Siyudad sa Sugbo.

Matud ni Police Staff Sergeant Joel Perolino, imbestigador sa maong insidente nga ang biktima naglakaw diha sa lugar nga nahitaboan ug nakabantay kini nga ang suspek naglingkod sa iyang motor nga nag-parking.

Ug dihang natungod ang biktima sa suspek gigakos kini sa maong snatcher dayong ilog sa cellphone.

Nag-inilogay ang suspek ug biktima ug nakasakay pa og balik ang snatcher sa iyahang motorsiklo apan dihang gipadagan niya kini nakuptan sa biktima ang motorsiklo ug gitumba dayong singgit og “kawatan”.

Ang mga tawo diha sa palibot nga naalarma nitabang kini sa biktima hinungdan nga nasikop ang suspetsado.

Si Police Colonel Ireneo Dalogdog, city director sa Cebu City Police Office nagkanayon nga aduna sila’y beat patrollers diin ang kapolisan sa mga police station mogawas ug ang mahibilin lang mao ang desk officer, general investigator ug ang magbantay sa custodial facility.

Tugbang sila sa Urban Patrollers gikan sa Cebu City Mobile Force Company (CMFC) nga gipangulohan ni Police Lieutenant Colonel Dexter Calaca nga 24/7 magtuyok-tuyok sa siyudad sa Sugbo aron pagpakgang sa tanang matang sa kreminalidad.

Ug aduna usab sila’y Tactical Motorcycle Riding Unit nga ipadala kon adunay kalihokan nga dugokan og daghang tawo aron mobantay sa seguridad.

Sa laing bahin, Si konsehal Hydellin Rafols sa Barangay Dumlog nibutyag nga dako og tabang ang gihimo sa kapolisan ug sa intervention program ngadto sa mga batan-on nga malambigit sa kagubot.

Ang maong programa giapilan sa tibuok barangay diin ang ilang mga batan-on nga kanunay’ng maalarma ang gipatawag lakip na ang ilang ginikanan.

Ang ilang programa molanat kini hangtud sa siyam ka session diin ang mga batan-on i-monitor sa ilang mga lihok diha sa gawas.  - Gabriel C. Bonjoc, BDB (BANATNEWS)