Tulo ka tawo nakuhaan og P10 milyon sa buybust operation

CEBU, Philippines —  Tulo ang nadakpan sa gihimong buy-bust operation sa Drug Enforcement Unit sa Sawang Police Station 6 pinangulohan ni Police Major Francis Renz Talosig sa Sitio Gochan, Barangay Pahina Central, Siyudad sa Sugbo niadtong Huwebes sa gabii.

Giila ang dinakpan nga sila si Elynjob Bangga Nacario alyas “Talolong”, bag-ong na-identify nga High Value Individual, residente sa naasoy nga lugar ug maoy subject sa buy-bust operation; Ramil Abellanosa Uy, Street Level Individual, molopyo sa Sitio Avocado, Barangay Mambaling ug Benjie Sanchez Atillo, Street Level Individual, molupyo Sitio Avocado.

Moabot sa 1,510 grams gituohang sa shabu nga mobalor og P10.2 million ang nakompiskar sa kapulisan.

Sigon ni Police Colonel Ireneo Dalogdog, City Director sa Cebu City Police Office nga si Nacario nadakpan na niadtong tuig 2020 gumikan sa kalambigitan sa illegal drugs.

Matud ni Dalogdog base sa gitug-an sa ni Nacario ang tinubdan niya sa illegal drugs iyahang brother-in-law nga nailhan sa ngalan nga Alfiel Tiu kinsa nadakpan niadtong 2018 sa Camotes Island ug kasamtangan nabilanggo sa Cebu City Jail Male Dormitory.

“Kining suspect nga nakuhaan gyud sa iyahang possession ang control sa maong shabu nga si alyas Talolong ingon siya kining item gi deliver lang sa iyaha didto sa atubangan sa mall sa (colon) last week nanawag lang kuno kining iyahang brother-in-law and then naay manawag sa iyaha pagtawag didto na niya makita naa didto nakakuan ang tao nga naka standby nga gi-turnover sa iyaha tong item nga more than one kilo,” ni Dalogdog pa.

Matud pa ang area of operation sa dinakpan naa sa Barangay Pahina Central, Mambaling ug mga silingang Barangays.

Gitug-an matod pa sa suspect nga sa milabay nga semana 109 grams lang ang iyang gidala ug niadtong Huwebes lang siya nakasuway nga nakadala og kapin usa ka kilo.

Ang mga dinakpan pasakaan og kasong kalapasan ss Sections 5 ug 11 sa Article II sa Republic Act 9165.—  Romeo D. Marantal, IBM (BANATNEWS)