Mga miyembro sa fraternities gitapok ni Labella

CEBU, Philippines — Gitapok ni Konsehal Jaypee Labella ang mga miyembro sa Alpha Kappa Rho ug Tau Gamma Phi sa niaging adlaw alang sa paglimpiyo sa ilegal nga graffiti.

Base sa taho sa special assistant on special projects ni Mayor Michael Rama nga si Ramil Ayuman nga usa sa mga paril nga gilimpiyohan sa maong mga grupo mao ang

Lorega San Miguel habig sa dalan MJ Cuenco diin napuno kini sa vandal.

Sa iyang bahin, si Labella nagpasalamat kini sa duha ka grupo gumikan sa pagtabang niini sa programa sa Dakbayan sa Sugbo.

Ang maong programa subay kini sa kamandoan ni Mayor Michael Rama isip usa sa mga pamaagi sa pagmentinar sa kalimpiyo sa siyudad ilabi na sa tinguha niini nga masusama kini sa Singapore.

Nanghinaot ang konsehal nga makabaton og disiplina ang katawhan ug likayan na ang vandalism.

Subsob na ang gihimo nila nga pagtangtang sa ilegal nga graffiti diha sa nagkadaiyang dapit. Matud ni Labella nga ang nagkadaiyang fraternities maoy gihangyo sa kagamhanan sa siyudad sa pagtabang sa maong programa.

Gipahimangnoan sa kagamhanan sa siyudad ang publiko  nga magsugod sa panimalay ang mga aksiyon alang sa pagkab-ot sa kalimpiyo sa dakbayan ug usa na niini mao nga dili magpataka og labay sa mga basura. (BANAT NEWS)