DPWH giawhag pabutangag suga ang CSCR

CEBU, Philippines —  Nagpadayon gihapon ang kangitngit panahon sa kagabhion sa Cebu South Coastal Road (CSCR) habig sa Dakbayan sa Talisay.

Kini maoy naobserbahan ni konsehal Lito Bacaltos sa siyudad. Matud pa ni Bacaltos nga angay na gyud kining atimanon ug mapasiga ang mga suga CSCR aron klaro kini sa mga motorista ang karsada.

Asoy pa sa konsehal nga natural nga kusog ang dagan sa mga sakyanan gumikan kay highway man kini.

Gani daghan na nga panghitabo nga disgrasya sa lugar gumikan sa human error ug ang uban mao ang kangitngit sa dalan.

Kaniadto, usa ka motorista ang nabangga patay sa traysikad nga naa sa daplin tungod kay wa kini makabantay nga naa diay kini sa daplin gumikan sa kangitngit.

Si Bacaltos nitataw nga mogama siya og resolusyon sa paghangyo sa Department of Public Works and Highways (DPWH) nga unta ila na kining tagdon ang dugay na nga suliran sa motorista.

Kahinumdoman, si Mayor Gerald Anthony “Samsam” Gullas nanawagan nasab sa maong buhatan aron ila kining atimanon ang suga sa CSCR apan hangtud karon wa pa gihapon kini malihok. (BANAT NEWS)