Lending investor nasakmitan og mga armas  

CEBU, Philippines —  Usa lending investor ang nasikop sa kapolisan sa Mandaue City Police Office human kini giingong nasakmiti og mga armas niadtong Martes sa kadlawon diha sa Barangay Usmad, Lungsod sa Argao.

Ang kapolisan niimplementar sa search warrant diha sa balay sa suspetsado nga si Rolando Pantinople alyas “Enting”, 46-anyos, minyo residente sa nahisgutang lugar.

Si Pantinople giingong lending investor kini sa Casino Filipino diha sa Dakbayan sa Mandaue.

Nasakmit sa kapolisan gikan sa suspetsado ang duha ka empty magazine sa kalibre .45 nga pistola; black belt bag nga adunay usa ka kalibre .45 Bersa pistol nga adunay upat ka magazine ug buhi nga bala; caliber .40 pistol nga adunay magazine ug pito ka buhing bala; magazine sa kalibre .45; 15 ka rounds sa buhi nga bala sa 12 gauge shotgun ug lain-laing bala ug empty

shells; duha ka empty short magazine sa caliber .5.56 M16; usa ka M16 assault rifle nga adunay unom ka buhing bala; usa ka shotgun ug uban pa.

Ang City Intelligence Unit gipangulohan ni Police Lieutenant Colonel Verniño Noserale, Police Major Romeo Caacoy, hepe sa Police Station 2 sa Mandaue City Police Office, personnel sa

Special Weapon and Tactic (SWAT) sa MCPO nakig-alayon sa kapolisan sa Lungsod sa Argao sa pag- implementar sa SW batok sa suspetsado.

Ang sakyanan sa suspetsado nga Montero Pyrenees kolor itom nga adunay plate number AED 6341 ang gikustodiya usab kini sa kapolisan.

Giingong ang maong sakyanan maoy gigamit sa shooting incident niadtong Enero 31, 2023 diha sa EO Perez Street, Subangdako, Dakbayan sa Mandaue kinsa ang biktima mao si Conrado Cosares ug namatay kini sa maong pagpamusil.  Matud ni Police Lieutenant Colonel Franc Rudolf

Oriol, deputy city director for operations ug tigpamaba MCPO nga nagpa-lending sa casino ang suspetsado diin mao kini ang tinubdan sa iyang income.  (BANAT NEWS)