Mayor Enad malaumon nga molambo ang lungsod sa Minglanilla

CEBU, Philippines —  Gihulagway ni mayor Rajiv Enad sa lungsod sa Minglanilla nga mosulbong ang ilang lungsod sa umaabot nga mga adlaw.

Kini maoy iyang panahom human ang provincial board sa Sugbo niaprubar sa proyekto nga 100 ka ekyarya nga Minglanilla Reclamation and Industrial Park.

Ang resolusyon giduso ni board member Raul Bacaltos sa unang distrito ug ni board member Glenn Anthony Soco sa ikaunom nga distrito niadtong adlaw nga Lunes atol sa ilang regular session.

Una niini, ang proyekto giaprubahan sa Cebu Provincial Reclamation Authority (CPRA)

pinangulohan ni Gobernador Gwendolyn Garcia ug giduso sa provincial board niadtong Disyembre 2 sa miaging tuig.

Suma pa ni mayor Enad sa iyang post sa facebook nga ang maong proyekto nagpamatuod lang nga usa ka maanindot nga lungsod ang Minglanilla ug maila unya kini nga “best shining star” sa habagatan.

“We are now at the threshold of unprecedented heights of development sa atong lungsod— kalamboan nga alang sa mga Minglanillahanon,” tipik sa Facebook Page post ni Enad.

Napanglantawan usab ni Enad nga daghan unya nga trabaho ang mapaabot sa taga Minglanilla ug molambo pa ang ekonomiya sa ilang lungsod.