Nitulis ug nipatay sa drayber nangadakpan
CEBU, Philippines — Nangadakpan sa hot pursuit operation ang tulo ka mga tawong suspetsado sa pagtulis ug pagdunggab patay sa habal-habal driver nga nahitabo sa Sitio Manlubog sa Barangay Ipil sa Lungsod sa Carmen sa miaging adlaw.
Si Police Major Eric Gingoyon, hepe sa Carmen Police Station ang miila sa tulo nga mao sila si Jemros Malbago, 22, Mario Ramil Maningo, 51, ug Aldren Balibad, 23, pulos nagpuyo sa maong dapit.
Matud pa ni Gingoyon narekober gikan kanila ang sling bag sa biktimang si Gilbert Albaño Basan, 41. Ang mga suspek mga silingan lang sa biktima.
Dugang pa ni Gingoyon nga nasakmit usab nila ang 14 pulgada nga kutsilyo nga gialegar nga maoy gigamit sa pagdunggab ngadto sa biktima.
Matud pa nga giatangan sa mga suspetsado ang biktima nga padulong na pauli sa ilang panimalay ug gidunggab.
Human sa maong pagdunggab ilang gisakiyo ang sling bag nga gidala sa biktima nga gisudlan sa kuwarta nga gipadala sa asawa niini nga usa ka OFW.— /IBM (BANAT NEWS)
- Latest
