Grabeng kahuot sa traffic sa Jones Avenue

CEBU, Philippines — Nakasinati og grabeng paghuot sa dagan sa trapiko ang Osmeña Blvd. (Jones Avenue) tungod gisugdan na ang pagtrabaho sa Bus Rapid Transit (BRT) diin dunay bahin sa maong karsada ang gisirad-an.

Human gipahigayon ang ground breaking nga gipangulohan mismo ni Presidente Ferdinand Marcos Jr. sayo ning semanaha, gisugdan dayon ang pagtrabaho miaging gabii pinaagi sa pagkubkob sa center island sa maong karsada.

Matud pa ni Paul Gationg sa Public Mass Transportation Division nga sugdan unta sa contractor gikan sa Fuente hangtud sa Arlington pond ang pagkubkob apan adunay problema sa DPWH nga wala niya madetalye kun unsa.

Dugang pa ni Gationg nga ‘by section’ nga trabahoon  ang center island. Ang kada section 170 metros ngadto sa 200 metros ang gitas-on.

“Kana man gud 170 meters mubo ra kaayo na siya and actually gikan na siya sa Arlington hangtod sa Urgello nga side. Ang karon lang normal man na siya kanang mausab ang dalan nato naa man jud nay adjustment sa mga driver specially kanang wala ka hibaw ba from lapad kaayo four lanes nahimo siya two lanes,” sigon ni Gationg.

Matud pa ni Gationg nga aduna silay ibutang nga time board aron dli mag ilugay ang mga motorista. Nanawagan si Gationg sa mga motorista nga dili importante ang tuyo paingon sa downtown area likayan nila ang pag-agi sa Osmeña Blvd.

“So far wala tay rerouting sa ating public utility vehicle kay ato silang gi priority ang mananakay jud diha nga area,” sigon ni Gationg. (/IBM) (BANAT NEWS)