COSAP gidayeg ug giimbitar ngadto sa Amerika

CEBU, Philippines —  Human nabatyagan ug nakadawat usab og mga pagdayeg gikan sa nagkalain-laing nasud ang Community-based Drug Rehabilitation Program sa Siyudad sa Sugbo, ang Cebu City Office Substance Abuse Prevention (COSAP) giimbitar kini ngadto sa Amerika alang sa pag-explore sa dugang nga pamaagi sa maong dapit kabahin sa rehabilitasyon.

Matud ni Jonah John Rodriguez, executive director sa COSAP nga dakong garbo alang kaniya nga maimbitar sa maong dapit gumikan kay seguradong daghan siya og makat-onan. “Moduaw ta og nagkadaiyang rehabilitation centers sa maong lugar.  Mokuha ta og idea niini nga mahimong ma-apply sa Cebu City”, padayag ni Rodriguez.

Posibleng sa tunga-tungang bahin sa tuig ang paglarga niya ngadto sa Amerika.

Lakip sa iyang ipa-expose sa maong oportunidad mao ang pipila ka recovery coaches sa siyudad.

Nasayran nga sa niaging tuig pipila ka mga opisyal sa  United Nations Office on Drugs and Crime (UNODC) ang nibisita sa  Dakbayan sa Sugbo diin nisaksi kini sa pipila ka pamaagi sa COSAP  o sa lokal nga kagmahamnan alang sa kampanya niini sa pakigbatok sa ginadiling drugas.

Ang maong mga personalidad naggikan sa Thailand, Cambodia, Indonesia, Laos, Myanmar, ug Vietnam.

Nagpasabot kini nga nabantayan sa laing mga nasud ang mga maayong programa nga gipasiugdahan sa COSAP.

Matud ni Rodriguez nga importante usab ang pagbinayloay og ideya tungod kay makatabang kini sa pagdiskubre og ubang pamaagi nga mahimong i-apply sa kasamtangan nila nga mga programa.

Ang CBDRP maoy usa sa mga instrumento alang sa mga nagbisyo kaniadto nga nakaamgo na og nagbag-o sa ilang kinabuhi.

Ang mga nalambigit sa ginadiling drugas ipaubos kini sa pipila ka buwan nga rehabilitasyon diin diha sa ilang barangay ipahigayon ang nagkadaiyang mga seminar.  – BDB (BANATNEWS)