RHU sa Minglanilla misusi sa gibaligya nga mga pagkaon

CEBU, Philippines — Gisusi sa tinugyanan sa Rural Health Unit ang mga tighimo og pagkaon ingon man karenderya sa lungsod sa Minglanilla.

Kini aron masiguro nga luwas ang mga konsumidor sa ilang gipangkaon.

Gisusi nila ang mga tighimo og longganisa, burger patty, skinless chorizo, hopia, tempura ug mga dagkong kan-anan sa lungsod.

Lakip sa ilang gisusi kung nakakuha ba kini og mga permit labot sa sanitation o kalimpyo sa ilang lugar, drainage, sakto nga paglabay sa basura, kalimpyo sa tubig, health card ug saktong senina sa mga empleyado.

Si Dr. Mae Vicente Mañacap, pangu sa Minglanilla Health Unit ug ang sanitation officers sa Cebu Provincial Health Office mao ang personal nga misusi sa mga tighimo sa pagkaon ug mga karenderya.

Ilang gisiguro ang kalimpyo sa mga produkto sa lungsod sa dili pa kini mahatag ngadto sa mamalitay.

Estrikto sila tungod kay di sila gusto nga mao ni ang hinungdan sa mga panghitabo sama sa food poisoning. (BANATNEWS)