Mga naisyuha’g citation tickets sa CCTO gitagala’g tulo ka adlaw
CEBU, Philippines — Gihatagan ug tulo ka adlaw nga tagal sa Cebu City Transportation Office ang mga traffic violators sa pag-settle sa ilang kalapasan.
Kun mapakyas sila sa pagbayad sa mga multa pasakaan gilayon nila sila og kaso ngadto sa Cebu City Prosecutor's Office matud pa sa pangulo sa maong buhatan Raquel Arce.
Matud pa ni Arce, dili mominos sa 50 ka mga traffic violators ang ilang madakpan matag adlaw.
Sumala pa ni Arce, dili lang sila kutob sa pagpanakop, gipalig-on na usab nila ang aksyong legal batok sa mga malapason nga nibalewala sa ilang giisyu nga citation ticket.
Gitug-an ni Arce, gituman nila karon kung unsay nalatid sa balaod nga tulo ka adlaw lang ang pag settle sa mga traffic violations.
Gibutyag ni Arce, kung mapakyas sila pasakaan gayud sila og kaso ngadto sa piskaliya.
Dugang pa ni Arce, gisugdan nila sa buwan sa Enero ang pagpahugot sa ilang disiplina batok sa mga malapason nga driver.
Gihulagway usab ni Arce nga daw susama na sa display sa mga sakyanan ang ilang impounding area.
Giawhag ni Arce ang mga motorista nga wala silay angay kahadlokan nga madakpan kung mosunod lang gayud sila sa balaod sa trapiko sa ilang pagmaneho. — IBM (BANATNEWS)
- Latest
