Dialysis rooms sa matag District Clinics gitinguha
CEBU, Philippines — Sa higayon nga mahatagan na og katumanan, pabutangan gyud og dialysis room ang giplano ni Konsehal Jocelyn Pesquera nga district clinics sa mga bukirang barangay.
Sa pakighinabi ni Pesquera sa Banat News aduna na sila’y gipang-identify nga mga luna nga pagatukuran nga district clinics.
Matud pa niya nga dunay pa’y gihan-ay nga mga butang sama sa negosasyon sa mga tag-iya sa luna.
Nagkanayon ang konsehal nga importante kaayo ang pagbutang og dialysis room sa district clinics aron dili na mobiyahe og layo ang mga tawong nanginahanglan sa maong serbisyo. “Daghang services ang idalit sa atong district clinics. Ang ubang serbisyo sa city health kay i-offer pud diha,” matud pa ni Pesquera.
Pinaagi sa maong proyekto , dili mahago ang mga tawo sa kabukiran nga nanginahanglan og basic medical services.
Pinaagi sa maong pasilidad , malayo sa komplikado nga sitwasyon ang mga minor nga balatian nga gihambin sa mga tawo sanglit mahatagan man dayon kini og dinalian nga aksyong medical.
Target ni Pesquera ang upat ka district clinics kun diin ang duha niini imontar sa north district ,samtang ang laing duha ipahimutang sa south district.
Ang Dakbayan sa Sugbo gilangkoban og 80 ka mga barangay ,ug ang 22 niini kay nahimutang sa mga bukirang dapit. —/IBM (BANAT NEWS)
- Latest
